التأمل الذاتي

التأمل الذاتي

بعد ان انتهي الشاعر بحمد الله بعد حوالي 3 سنين في الكلام عن ماهي الطاقه والحمد لله لم يفسرها
اسمحو لي ان اتكلم في مجموعه من الموضوعات التي لا غني عنها
وابدأ سلسله " تعلم مع حوش" والكلام اللي هقوله كلام كبير

اولا التأمل الذاتي "الميديتيشن "meditation

ماهي الميديتيشن ؟؟ ما هي انواعها ؟؟؟هل تحتاج لمعلم ؟؟ ماهي المشاكل التي ممكن تقابلك ؟؟ ما هو الهدف من الميديتيشن؟؟ ما هو اصل الميديتيشن وهل يوجد ميديتيشن اسلامي ؟؟ طب ازاي ؟؟؟

الميديتيشن او التامل الذاتي هي اسلوب الهدف منه تهدئه النفس soul. والعقل mind والوصول الي حاله من التوحد

طب ليه ؟؟ لان الواحد مننا ممكن جدا يكون عنده مشاكل مع نفسه في حاله اليقظه
اقصد مثلا اخر مره حسيت انك مع نفسك وهادي او مثلا عندك يجي 300 الف حاجه لازم تتعمل وانت متسربع او فيه مشكله ما وعمال تفكر فيها عشان توجدلها حل لغايه لما دماغك سخنت وقربت تلسع او واحد منرفزك او واحد خنيق مضايقك او حاجه كاتمه علي نفسك ومخلياك عايز تنتحر كبت حرمان قرف .... الخ

اللي بيحصل عن المشاعر دي بيولد عند الشخص منا حاجتين الاولي انشغال العقل بالتفكير و تعب نفسي وجسدي تلاقي بطنك وجعتك او جالك طفح جلدي او تعطس بدون سبب ... الخ

يبقي الحل هنا هو تهدئه العقل والنفس باللجوء الي حاله مغايره لاهي نوم ولا هي يقظه وهي بيسموها حاله الالفا alfa state ودي فيها بتتغير الموجات الصادره من المخ لا بتشتغل كتير زي التفكير ولا بتهمد خالص زي النوم

طب الوصول للحاله دي يبقي ازاي ؟؟ يبقي عن طريق التركيز علي شيء واحد فقط ( ومن الممكن ان يتم تغييره ). اذا ركزت علي حاجه واحده بس طول الوقت دي بيسموها تأمل اولي plain meditation اما اذا ركزت علي حاجه وبعدين ركزت علي حاجه تانيه دي اسمها تأمل مركبcomposite meditation


طب ايه هي الوسائل المستخدمه للوصول للحاله دي
الوسائل دي تعتمد في المرحله الاولي للطالب علي الحواس الخمسه السمع البصر – الشم –اللمس- التذوق
وبعدين بيجي بعد كده حاجات تانيه زي التخيل – التذكر-....الخ

امثله :
البصر : تركز علي ضوء شمعه
اللمس : تدرب ايدك علي معرفه الالوان بلمس ورقه ملونه بالوان زي اخضر او احمر او حمصي
الشم : تركز علي شم رائحه واحده
السمع : ودي اسهل واصعب حاجه زي ما بتركز علي صوت الجيتار مثلا في اغنيه فيها الات كتيره
التذكر : حاجه تفتكرها
التخيل : تتخيل لون ابيض او احمر او تتخيل انك عريس في الكوشه او انك بتاكل كباب او كشري
المانترا : هي ترديد حروف معينه او كلمات معينه زي في تسبيح العيد الله اكبر

اسهل مثال هو اللي جابه هاني رمزي في فيلم ظاظا رئيس جمهوريه لما كان بيقول علي موضوع الكوز
انت عطشان اتخيل ان الكوز مليان بيبسي او ميه بورد واشرب وانبسط

معني كده ان احلام اليقظه احد الاشكال المبسطه للتأمل?? اه ولا . لان احلام اليقظه انت مسيطر فيها علي كل الاحداث وعلي الحاله بتاعتك اما اذا سبت نفسك بس حاسس باللي بيحصل حواليك يبقي مديدتيشن
You will be in meditation if you remain awaken and aware of the present moment in the alpha state of mind i.e. in the state of absolute calm

طب هات مثال اقوي شويه

لو رحت مولد السيده زينب ولقيت ناس بتفقر ( بتشديد القاف ) دول بيعملو ايه ؟؟دول حضرتك بيعملو حاجتين الاول بيركزوا علي صوت المنشد او علي الموسيقي والحاجه التانيه بيحركو جسمهم بطريقه متكرره وبعد خمس دقايق حضرتك تلاقي الواحد منهم بيطوح . ايه اللي بيحصل بالظبط ؟؟ انه بينسحب من كل المشاكل والهموم اللي عنده وبيروح لحاله جديده خالص مش سامع فيها غير صوت واحد بس

طب ايه هي المشاكل اللي بتقابل الطالب ؟؟
اول حاجه عدم القدره علي التركيز وده شيء صعب لانك هتلاقي صور كتيره بتجري ادامك (حتي وانت مغمض ودي صور عقليه متحزنه كامله او متداخله يعني صوره اخوك وهو سايق العربيه صوره كامله بس صورته وهو سايق العربيه وجنبه مدرس الكيميا بتاع 3 ثانوي دي متداخله

طب هل توجد ميديتيشن اسلاميه

الصلاه ميديتيشن لانها قائمه علي ترك أي شيء اخر وان تكون مع الله وكذلك قراءه القران
بس للاسف احنا بنسرح غصب عننا
علي كل حال فيه ميديتيشن اسلاميه ودي مركبه قايمه علي النفس والتخيل وترديد اسماء الله الحسني او تسبيح او ... الخ



كل علوم الطاقه تبدا من الميديتيشن لانها بتوصلك لحاله الصفاء والالفا ستيت اولا وبعد كده بنسحب الطاقه

الميديتيشن مهمه للحياه اليوميه مثلا انا كنت بشتغل مع زباين كتير وكل زبون له مشكله وفيه ناس رحمه فكنت بعد ما اخلص مع كل زبون باخد 30 ثانيه بس افصل فيها واخش في الميديتيشن واطلع صافي الذهن للي بعده

طب هل لاوم يكون فيه مدرس

طبعا لان المدرس عاش التجربه اللي الطالب فيها وعارف المشاكل الموجوده وعارف ازاي يخرجك منها

فيه مدارس بتعلم وبتطبق زي بتوع اليوجا وفيه مدارس بتعمل transmission من المدرس للطالب ودي بتبقي
عن احدي طريقتين اما موازنه او فيس تو فيس

انا مدرستي الدايموند واي المهامودرا التبيتيه diamond way ودي فيها ترانزميشن والتعليم فيها شفهي مش مكتوب ومش مسموح لي حاليا كشف خطواتها بس ممكن تعريف بالفكره العامه

علي كل حال فيه مشاكل كتير بتقف ادام الطلبه المسلمين اللي بيدرسوا التأمل زي مساله الكارما والتحصين لانها متاثره بالفكر الديني شويه

يعني انا مبعملش تحصين رغم ايماني العميق باختلاف المعني عن المعني الديني ولكن من باب اجتناب الشبهات

الميديتيشن الكامله بتبقي حوالي ربع ساعه في الاول وبتزيد بعد كده علي حسب قدره كل فرد
بس مفيش احلي من جلسه ميديتيشن اذا كان ذهنك مشغول